Qasa badih qafarih ummattah koboxuy may alsak 15-16/2009 fanah qafar rakaakayak inaytah tan samara magaalal gexsitak sugeh yani maysol yumurruqeh yanim qasa badih qafarih ximokraasih massoynak maysaxxaga kee uguugus exxah xaagi diggoyse.

Tama koboxut qasa badih qafarih ummatta dabboh elle geytimtah tan yamanaay,jabuutiiy, kanadaay itiyobiyah rasuk buureey,mandaay qeeli daqaaraay, baracleey,baddaay, qado kuwak edde yengeleenih yaniinim kee tonnah kaaduuy rasi kasleey kedoh abbobtiiy qunxaaneyti eglaay sayyoh eglaay seeco akah tekkeh tan qafar rakaakayih doolatih abba ismaqil qali sirrooy, qafar rakaakay miraacissah tan abxebba mirac ilyas casanaay baxaabaxsa le qafar rakaakayak daqortih mirocti loonuh yanin aytakuma qangor elle yoysobbeenih yaniinim kee elle faxximmi intah tan gitittel cattiimoonu waanah yaniinim timixxige.

Tama kobox yallih migaaqak qimmimeek illacabol massakaxxa le Qafar rakaakayih miraacaay massakaxxale qasa badih qafarih ximokraasih massoynah saqal ibrahim harunuuy, massakaxxale qafar dacarsittoh eglah saqal ismaqil qali gardooy, tonnah kaaduuy baadal sahdayti cakkih tangiicilleh tan eglah saqal oren kee tama eglak saqalah yanih yan saqal acmad yusuf qasa badih qafarih ummatta rasi addal edde geytimaanah yanin sax kee dabboh elle yamaateenih yanin rasittel keenit boodah yan gibdaabinitte fidga akah geytannah elle agaaradeenih yaniinim tunbulle.

Yekkeh yan kobox  qasa badih qafarih ummatta edde geytimtah tan saxaay dabbbooy,baacaay widirraaqat akah culoonu duudeenih yaniinim mannaay, akak elle yawqoonu duudaanah yaniinim kaaduuy mannay axcuk agaaradeeniik illacabol wagartiiloh ugraa kee yabcabah casbit akak newqeh nan rasu naddoowak fida akah mekelak ninni amoh xin ninni rasul ninnih madaqinnuh inki gitay dooro sinnih yani giclo kinnih tanim kee garbol tangiicilleh tan massoynaa kee giclo akah takkeh tan ummatta boor kee bagu akkuk afwargi baxih gagrih amol soolaanam faxximtah tanim yekkeh yan agaaradaak illacabol tontobbe.

Tama kobox elle yekkeh anuk yen handag baxaabaxsa le itroorak billiimeh anuk yenem kee axcuhi

Nettakkeeh sadnam saaxa!!

Ø      Qasa badak qafar matarraay, qasa bad qafar ardik mayarra.

Ø      Xukko gulubut duffunneeh giclo mogoyut asseedeenno.

Ø      Qasa bad bagut adda xer gadda quukaah, mayxayal baad arho beya.

Ø      Qigdu masaaxnaay, suumutuh nardi managran.

Ø      Qasa bad shaqbiyyah maddurih raceena mayakka.

Ø      Qasa bad qafarak ikoytaay, beedak falma.

Ø      Dammarat ximo lem labha lih aabuke wayte say mara hinna.

Ø      Guuro buxa rob ragsittaay, dabbo buxa saay. Ragsittay.

Ø      Ni- kasle boodot maxinta.

Iantah tan irooraa kee kalah raqtah tan itroorak billiimeh anuk yen.

Tama kobox gexisak sugteh tan 2012 num takkeh tan ummatta kobox elle yekkeh yan qafar rakaakayak inayta magaala samaral wagari solo gexiseenih yaniinim kee tama solo asyas kee fanata gexal hargamo tekkeh tanim kee Qasa badih qafarih ummattah niya tekkeh tanim timixxige.

Yekkeh yan koboxul ummatta toysebbeh tan itroorah tu-gactek qasa badih qafarih ummatta gandah akak dulen guub gandah aduureloonuuh, qasa bad asyas kee kay kedoh maddurih raceenah mayakkaay, Qasa badal qasa qabala caxennooh, Qasa bad niimiiy mari nagra akak maqansisnaay, baad doolatittee kee adam baxi cakkih tangiicilleh tan massoynaani qasa badih qafarih ummattat yakkeh saaxah hangi tacaayaay intah tan itrooraa kee too-bisleh tan itroora afat luk saaku 4-5:20 fanah gexisak sugeenih yaniinim qaddowte.

Illacabol 10 liggidah qasa badih qafarih ummattah sahdaytiinoh cakki geytiiy, fidin ximokraasih silaalat iraawitoonuuy, isinni rasih abbiinuu kee maddur sinnih yalloonuuy, isinni amoh xin isinnih madqidoonuh tangiicilleh tan giclo abak foyrot geytimtah tan mirocti acwa tontocowweh tanim nummawte.

Tama acwa yeceeh yan qafar dacarsittoh dadlih eglah saqal Ismaqil Qali Gardo qasa badih qafarih ummattah faxe gurral tangiicilleh tan meqem abittoh eglaalii kee massoynaanih gadda gacisak uxi yaanam nakur sinni giclo faxximtah tanim kee ummattaa kee goori giclo gexissah tan massoyna boor kee bagu yakkeenim edde faxximtah tan widdir kinnim elle kassiise.