Warreeh yan liggidat mangoh tan maritte akkaluk suge wayteh tan maysoosa baahak toh yaanam Eritriyah kobox gexisak mangoh tan maritte edde tengeleh anuk tenem tamixxige. tohlih kaaduuy mangoh tan liggiditteh shaqbiyyah xinto tasgayyem dude wayteh tan iro rasittel dabboh geytimtah tan ummatta uguugusak takkeh tan milaagi gicloh xaqut wilaaqak temeeteh tanim kassinna.

Eritriyah kobox maysol yumurruqeek illacabol tama koboxul mangoh tan mayso orbisak Higxef buttak reeda karma edde uxuxxottah tan widdirit geytimnah nanim tanbulle.

Tama koboxul madaqeenih yanin fidin Eretriyah koboxuh faxxiimah yan bicitte gexisak tama koboxul edde walaleenih yanin ximmom raqteh tan ummattal walalah obisak faxxiimah yan wadba gufeh geytimah yanim tanbulle.

Higxef xinto iro rasittel wayteh tan kibaalaak gexxaamah Eritreak sadi caylitte faxxiimah yan qokol geyak mangoh tan baad doolatitte Eritriyah dimokraasih eglah xaqut gacak Eritriyah ummatta Dimokraasih iroowoh gubat edde iraawittah tan ayro allat ane waytah tanim tamixxige.

Tengele ameerikah eglaay kee Ingiliiz doolat iro rasittel sigtah tan eritriyah xaylo acayuk sugteh tan boolul 02 namma gaba akah acee-waan innah abak shaqbiyyah xinto tokkek geyak sugteh tan catotta soolak tama xintoh qidaddo taanak temeeteh tanim tanbulle.

Illacabol shaqbiyyah xintok reeda karma elle uxuxxottah tan widdir baaheh yan Eritriyak fidin rasi kobox maysol yamurruquh inkih tan sadi caylitte faxxiimah yan doori digirtuh Eretriyak Dimokraasih eglak Maysaxxagah exxa seeco tatrussa.