Qasa badih qafarih ximokraasih massoynah geedassima June alsak 08/2009 qafar rakaakayak inayta magaala samaral culeenih yanin xagana abtol asisak rasu kee ummatta goorih foyroh hangi acayuk qaduwwi dannabiinuu kee cabaaruh xagana culak culeenih yanin xagana abinal asisak shaqbiyya qandeh digaala takkeh tan maaqatta ruubeenih yaniinim ayroh mawqa guubuk neegufeh yan xaagi diggoyse.

Tama xaagi elle qaddoyseh yan innal itlenti baraay June alsak 08/2009 shaqbiyyah qaxo kee fanat gexal hargamooy, qasa badih qafarih ummatta kee kacantoolitil sadagga tekkeh tan ayro kinnih tanim kee qasa badih qafarih ximokraasih massoynah gaadule Laamassanak Guruy deqsitta daqaaral nokteh sugteh tan shaqbiyyah qandek silliyat abeenih yanin maysattakat 10 cabaariseenih yaniinim kee 23 xaaguqal cabak 8 kalaashiniiy, inki bareniiy, mangoh tan qandeh uwwaytu boyliyak Guruy daqar shaqbiyyah silliyak amo-baxxaaqal yeyyeeqeenih yaniinim qaddowte.

Shaqbiyyah qandek 32 kifle saraawitit tekkeh tan maysattaka Asyas kee kay jeneraalittel hargamo tekkeh tanim kee qasa badih qafarih ximokraasih massoynah gaadule shaqbiyyah cabaaru kee boyli shaqbiyya qasa badih qafarih ummattah sax kee buubak sole waytah fanah cane gacsi sole wayu waah yanim qaddoysak amoh xin essero illacabo fidga geytam kee fanah goori giclo kee cane gacsi rabi illacabo alle waah yanim qasa badih qafarih ximokraasih massoynak qandeh exxa teybeleeleqe.

Qasa badih qafarih ummatta elle aninnaan ikkel shaqbiyyah sadu kee goori gicloh aytakumat libdo hoonuh qasa badih qarih ximokraasih massoyna seeco tatrussa.