Eretriyak agatitte ximokraasih foci xissiimuh namma massoyna june aslak 18/19 fanah gexisak sugteh tani maysol tumurruqe. Tama daffeyna eretriyak agatitte ximokraasih foocay xigbe amixxiguk xissemte.

Tama namma massoyna axcih qasa badih qafarih ximokraasih massoynaa kee erertriyah kunaamah ximokraasih foca giclo inki xaquuk xakbisse caylat ummatta fanteena abak gexissah tan giclo 10 karma gufusseh geytimta. Tama namma ayroh fanah gexsitak sugeth tan daffeynal xissiimeh yan foci edde gexsitu waah yan taddiiraa kee madqooqi daffeysen. Baxaabaxsa le rasi caagiidat walaleeniik illacabol margaqooqi elle yeyyeeqen. Tamahaak illacabol 6 alsi taamah ekraaro daffeysak taama abinal asissu waytah tan mirocti elle dooren.

Eretriyal agattinah essero gaabewe waytuh 1995 qimmisak alif edde hayteh tan shaqbiyyah xintoo kee geraytuleela isinni fayxiik amukkuquk alfimak maacisse. Ummatta ummattah innal angiicille wayteemih taagah qasa badih qafarih ximokraasih massoynaa kee eretriyah kunaamah ximokraasih angagoyyi ummatta fanteena abak uguseenih yanin giclo asaaku edde geytimtah tan caddimna gufusse. Mangoh tan exxaaxiy daga raq akke waytek iki gid akkiyal amine sinni adaf madrissak gibbattay immay namma massoyna agatitte ximokraasih fooca xissa haytah fanah gexsitak temeeteh tanim tanbulle.Tatreh yan mango abak raagak baritak inki ummattah essero mango ummattay ceelok baxaysitteh tanih ceelo kibtaamih saami geytimah yan widdir yaniimil aminuk agatitteh gicloh fakut yanih yan ximokraasih foca xisen. Agatitteh essero faxxiime sinnim celsiisak sugteh tan caylitte siyaasa gubak dagat edde raaqak ummattah ceelo aracat haytuh ugutteh tan giclo bisoh intuh agat takkuu exxaaxih tan xisne takku oggolla.

Baxsa le soocoy eretriyah tigreeniyah agatah taturte. amo baxxaaqa gicloh mekelteh tan nado dagoom matakka. Takkay ikkah ceena leh tan butta tigreeniyah agatih migaaqal ummattal bahtah tan gibdaabini raaqeh yan agatittek waluh abluk cedaanam faxximta. Tama calli yakkuh tah fanah sugeh yan gaabow caagid axcih inki sorkocobbaxaay inki ummatta intah tan itroora hinnay sinni agatih caddol gaaboowak cakki cina hinnay ifu hayya heenih cakki massoowoonuh seeco tatrusna. Tama sooco abinal asissam ummattah ceelol amanuk gexxah tan exxaaxik fayxi kinnim qaddosna. Sinnih gaaboowak milaagu bahtoonuh uguta; sinnil tanih tan dirkik eweqa; tamaham kaaduuy eretriyak agatitte massoynaanih tatrusnah nan seeco. Agatitte massoynaani sin saqoolukkah sin naqaboolit cakkil qubul qiddah tan exxaaxi arraabat tabbeenih tannin sin naqabtooli hinna. Inkih tan eretrriyah agatitte tama seecol faxxiimah yan gacsa abtuh xissimteh tan eretriyak agatitte ximokraasih foci kibaalal qammaala. Eretriyak ximokraasih egla wahsiisak eretriyah agatitteh ximokraasih foci ximokraasih egla enni intah tan sadi caylitte edde iraawittah tan silal kinniimil taamineh. Uxi fooca fanah tama egla silaalah raagtuh faxximmi iyyah yan macal abelem qaddossa. Tatreh yan tama eglah koboxul eretriyak agatitte doori maca ceelak yenem kulli gammik akah rammiten ximmok ten. Fooca fanah eretriyak agatitteh ximoraasih foci garbol giclo gexissi haytah tan caylitte maqar bahtuh angiicillele. Inkiinot tuxxiiqik tanim taaxigem agatitte massoynaani kinniimih taagah inkiino waartuh faxximmi inta giclo able.

Rasi caddoh kobox wagsiisak tama caagiida akak xayyowtam kinni gabaa kee akah xayyowtam kinni fayxi tah fanah axige waytam qaddossa. Nummaak eretriyal tanih tan uma xintoh naqabuuk ugutak faxah yan maraa kee umam abeenitih tu faxah yan marih fayxih hittak elle baxisaanah yanin weelol ane waytam tamixxige. Inki inmki exxaaxik xayyoowah yan yaabal mango massoynaanih fayxi akke waytah tanim qaddoysan. Naharak elle qaddosne innal ifu leemiy ummatta tuxxiq akak geytu dudda edde ane waytam tanbulle.tama caagiodaadi ummattah eglaaliiy, xaagu qawaay xaagi waraakit kee cizbitte qaduwwi amol yakkeh yan sadi angoyya edde buulaana gidih yakke angoyya kinnim tanbulle. Rasi caddoh gaaboowih  migaqa akah abak abaanah yanin angoyyi eretriyah agat kee agattiinah ceelol amine waak gexsitek beerih eretrioyal salaam kee say caabi yakkem dude waam tanbulle.

Qande galitte leh tan massoynaanih giddaanimi wagsiisak eretriyak agatitte ximokraasih foci elle qaddoyse innal siyaasa manga tanikkal qande manga ane waytah tanim tamixxige. Rasi qande xissimmi inte agatitteh inki gid akkiyyi yamaatuh qande gali leh tanih tan massoynaani qimmok massoowak titta gey kee baxsi elle yanim baxxaaqisa qaduwwi giglol hitta geyaanam faxximta.

Tadaamun deqsitah yan fooca wagsiisak dagal akah qaddosneh sugne innah abinal asisnah nan qokol hittallih abnuh bicat geytimna.  Eretriya agatitte ximokraasih foci tadaamun fooca luk leh yan angaaraw qaduwwi ramidiik eyyeqa heenih eretriyal milaagi geytimuh yangiicilleenimi. Eretriyah agatitteh ximoraasih foci massoynaani takkay xisneena takkay agle faxinnaan sadi angagoyyitteh fakimit yanih yanim tama foocih xisnet marrowte adoytit madaqte.

Ereriyah ximokraasih eglak irot geytimtah tan eglaaliy agatitteh essero aytakumussa wagsiisak agatuitte ximoraasih foci ximokraasih eglak irot anuk inki gid akkiyyaa kee agatitteh ceelol yaamineh yan mara luk dumaak tangiiclluh faxximtah tan taamoomik tumurruqeh geytimta. Tohuuk ugutak qusba fayxiiy qusba gaabownaay, qusbaah dimokraasik tan eretriyal amanuk ugutaanam faxximta Cugaaneenat raqtah tan rasittek baxsa luk itiyoobiyah ummattaa kee doolataay sudaan doolataay yamanaay jabuuti doolatitte ni ummattay isinni rasu cabak dabboh tamaateh abaanah yanin catottaa kee aytakuma sorkocobbaxaak gadda keenih gacisna  Itiyoobiyak ummatta malah buxa teyyeeqeh tan ascossa eretriyah ummattah im eretriyah ummattah tandabbay inta aytakumusnaah qokollaah abinal assuh faxximmi iyyah yan macal abonno.