Qasa badih qafarih ximokraasih massoyna kee eretriyah kunaamah ximokraasih massoyna inki alssak naharal makcaggurul akah gaceenih yanin foci xisnet bisoh axcuk june alsak 18/2009 itiyoobiyah rasuk tigraay rakaakayak inayta magaala megel fayya le caddimnal kobox qimmiseenih yaniinim qimmiseh yanim timixxige.

Tama kobox shaqbiyyah xukkoh quxuysut geytimtah tan eretriyah ummatta axcih xukko fayya le caddimnal salalah elle tanih tan eretriyah agattiinaanik axcih qasa badih qafarih ummatta kee kunaamah ummatta edde geytimtah tan xukko titek amo baxxaaqah diiful edde yawqoonuh ummattah caabi quukah elle tanih tan massoynaani kinnuuk giclo malaa kee ummatta goorih foyroh hangi acayuk inkittiino libdooy qaduwwik cabaari mala kinnim asmituk qandeh caagid kee qaduwwi oytil yangaloonuh eretriyah agattiinaanih fooca deqsitah yan fooca xiseenih yaniinim qasa badih qafarih ximokraasih massoyanak maysaxxagaa kee uguugus exxah saqal Yasin macammad qabdalla abeh yan baxxaqsal nummayse.

Tama namma agat massoynaani elle yengeleenih yaniinim qaduwwi oytaa kee faxxiimak maacissek yangalem maysattaka qaduwwit abak cabaaru kee boyli higxef qaxot akah yammaggennah abaanam tama namma massoynak foyroh afkan kinnih tanim tamixxige.

Tama kobox elle yekkeh yan handag baxaabaxsa le itroorak billiimeh yanim kee axcih sinni amoh xin sinnih madak ilaa baxsa fan inta itrooy, Kunaamah ummatta kee Qasa badih qafarih ummattah qalli waareleeh, mayso madabiino koboxih imiiy, Itiyobiyak mala qari adoytit teyyeeqeh tan madqa aytakumusnaah namma rasih ummatta xayyossoh tan maaqatta kinnih tanim qaddoyseniih, namma massoyna abtah tan foci egla qaduwil hargamooy, le ummattal rufto intah tan itroo raakee kalah raqtah tan itroorak anuk tenem tama koboxut yengeleh yan ximokraasih eglah xongolok qafar afih awlayti qaddoyse.

Tama koboxut sooco akah tekkeh tan qibinaay, namma massoynaanih adoytiitiiy namma massoynaanik ummattah eglaalih awlaytiitiiy, doolatak fayya le xagortiiy, iro rasittek temeeteh tan namma massoynaanih adoytit edde tengeleh tanim kee kobox assakot le weelol qimmimeh yanim timixxige.

Yekkeh yan koboxul fooca namma sanat fanah miraacissu waytah tan namma massoynak 14 takke fanti makaadoh adoytit elle dooreenih yaniinim kee osonuuy Ibrahim harun, Macammad shina, Abdu shek, Yasin macammad, Macammad maqar, Abdalla qumar, Ali katar.